Արդյո՞ք վեգան լինելը համատեղելի է ձեր հղիության հետ

Արդյո՞ք բուսական սննդակարգն ազդում է ձեր վերարտադրողական ունակությունների կամ հղիության ընթացքի վրա

 

 

Արդյո՞ք կարող եք վեգան լինել և միաժամանակ առողջ հղիություն ունենալ: Արդյո՞ք հղիության համար ռիսկեր կան խիստ բուսական սննդակարգին հետևելու դեպքում: Եվ կարո՞ղ է բուսական սննդակարգն ազդել ձեր հղիանալու փորձերի վրա: Ահա և պատասխանները ՝ այո, այո, և կրկին այո:

Իհարկե, չի բացառվում, որ կկարողանաք շարունակել լինել վեգան և ունենալ առողջ հղիություն: Այնուամենայնիվ, խիստ բուսական սննդակարգը ձեզ վտանգի տակ է դնում որոշ կարևոր սննդանյութերի անբավարարության հետևանքով, և եթե չշտկվի, ապա այն կարող է վնասել թե՛ ձեր երեխային, թե՛ ազդել ձեր երեխա ունենալու ունակության վրա, երբ փորձեք հղիանալ:
http://listverse.info
Ակնարկ

Բուսակերների որոշ մասը հրաժարվում են իրենց սննդակարգում օգտագործել միս, բայց միևնույն ժամանակ կարող են ուտել ձու կամ կաթնամթերք: Մինչդեռ վեգանները խստիվ չեն օգտագործում բոլոր կենդանական ծագում ունեցող սննդամթերքները:

Հնարավոր ռիսկի գործոնները

Լավ նորությունն այն է, որ ինչպես բուսական, այնպես էլ վեգանական սննդակարգին հետևող կանանց մոտ չի դիտվել հղիության ընթացքում լուրջ բարդությունների առաջացում, կամ չի մեծացել բնածին արատների առաջացման ռիսկը, քանի դեռ վերահսկվում և շտկվում է վիտամին B 12-ի մակարդակը և երկաթի անբավարարության հետևանքով առաջացած անեմիան:

Վիտամին B 12 -ի անբավարարություն

Կարևոր է փաստել, որ եթե կանայք, ովքեր իրենց մոտ առկա երկաթի անբավարարությունը չեն շտկում սննդակարգի միջոցով, կարող են մեծ հավանականությամբ կանգնել հղիության բարդությունների և պտղի մոտ բնածին արատների առաջացման ռիսկի առջև: Հղիության ընթացքում վիտամին B 12-ի անբավարարությունը կարող է հանգեցնել պտղի մոտ նյարդային խողովակի ձևավորման բնածին արատների առաջացմանը և ծնվելուց հետո հնարավոր է հանգեցնի ճանաչողական ֆունկցիայի խանգարմանը։

Սակավարյունություն

Հղիության ընթացքում սակավարյունությունը տարածված խնդիր է, նույնիսկ նրանց մոտ, ովքեր օգտագործում են կենդանական ծագման սննդակարգ: Վեգանները անեմիայի զարգացման շատ մեծ ռիսկի տակ են գտնվում: Անեմիան կարող է հանգեցնել հետևյալ բարդությունների՝ վաղաժամ ծննդաբերության, ցածր քաշով երեխա ունենալուն, երեխայի մոտ ճանաչողական ֆունկցիայի խանգարման կամ գլոբալ զարգացման հապաղման։

Որպես մայր ՝ սակավարյունությունը մեծացնում է հետծննդյան դեպրեսիայի առաջացման ռիսկը և ծննդաբերությունից հետո արյան փոխներարկման անհրաժեշտության ռիսկը:

Սննդանյութերի անբավարարություն

Մեկ այլ հնարավոր (բայց ոչ ուղղակի) մտահոգության առիթ է հանդիսանում, որի մասին պետք է իմանան բոլոր վեգան սննդակարգին հետևողները, այն, որ երբեմն բուսակերությունը զուգորդվում է սննդային այլ սահմանափակող սովորությունների հետ: Բուսակերությունը հաճախ զուգորդվում է հում սննդամթերքների օգտագործման, մակրոբիոտիկ դիետայի կամ հետագայում ձեր սննդից այլ սննդատեսակների բացառման հետ։ Այս ամենը մեծացնում է սննդային կամ կալորիականության անբավարարության ռիսկը:Եթե դուք վեգան եք և սննդային այլ սահմանափակումներ ունեք, չափազանց կարևոր է և կենսական է խորհրդակցել դիետոլոգի հետ:

 

Ինչու՞ է վիտամին B 12-ն այդքան կարևոր

Վիտամին B 12- ը դժվար է (անգամ անհնարին) բավարար քանակությամբ ստանալ վեգանական սննդակարգի միջոցով: Այն մատչելի է օրգանիզմի կողմից յուրացման համար միայն կենդանական սննդի աղբյուրներից ստացման դեպքում: Դրա համար վեգաններին նշանակվում է վիտամինային հավելումներ և վիտամիններով հարստացված սննդի տեսականի: Գուցե բուսակերները կարողանան բավարար քանակությամբ վիտամին B 12 ստանալ կաթնամթերքից և ձվից, բայց սովորաբար նրանց նույնպես առաջարկվում է օգտագործել վիտամինային հավելումներ:

Հավանաբար գիտեք, որ ֆոլաթթուն (վիտամին B 9) իրենից ներկայացնում է մեկ այլ B խմբի վիտամին, որը նույնպես կենսական դեր ունի պտղի ուղեղի և ողնուղեղի զարգացման գործում: Այս կարևոր օրգանների ձևավորումը և զարգացումը տեղի է ունենում հղիության շատ վաղ շրջանում, հնարավոր է ՝ կինն անգամ չիմանա, որ հղիացել է:

Շատ կանայք տեղեկացված չեն, որ վիտամին B 12- ը կարող է նույնքան կարևոր լինել, որքան ֆոլաթթուն պտղի նյարդային համակարգի նորմալ ֆունկցիայի և զարգացման գործում:

Առողջապահության համաշխարհային կազմակերպության տվյալների համաձայն, վիտամին B 12- ի ցածր մակարդակը կարող է մեծացնել նյարդային խողովակի բնածին արատների զարգացման վտանգը:

Վիտամինային անբավարարության հետևանքները

Նորածիններն ու փոքր երեխաները, ովքեր ունեն վիտամին B 12-ի անբավարարություն, նրանց մոտ կարող է երկար ժամանակ պահպանվել անբավարարությանը բնորոշ ախտանշանները: Վիտամինային անբավարարության ախտանշանները կարող է ներառել ՝ զարգացման հապաղում, ճանաչողական ֆունկցիայի նվազում և դպրոցում ուսանելու ավելի ցածր կարողություն: Որոշ ուսումնասիրություններ պարզել են, որ այդ երեխաների մոտ ի հայտ եկած նյարդաբանական խնդիրները երբեք լիովին չեն վերականգնվում, անգամ լիարժեք բուժում ստանալուց հետո:

Սա է գլխավոր պատճառը, որ շատ կարևոր է բոլոր մանկածին կանայք անկախ տարիքից իրենց սննդակարգում ընդունեն բավարար քանակությամբ ֆոլաթթու և վիտամին B 12: Ֆոլաթթվով հարուստ սննդամթերքներն են ՝ մուգ թերթերով կանաչիները, ծնեբեկը, բրոկկոլին, լոբին և ոսպը: Բուսական սննդակարգին հետևողների առողջ սննդակարգը պետք է հարուստ լինի այս մթերքներով:

Իսկ ինչ վերաբերվում է վիտամին B 12-ին այն բավարար քանակությամբ ստանալու համար անհրաժեշտ կլինի օգտագործել սննդաին հավելումներ: Դուք կարող եք պրենատալ շրջանում բավարար քանակությամբ վիտամիններ ստանալ, կամ, եթե դա ձեզ չի հաջողվում, ապա ձեր բժիշկը կարող է առաջարկել առանձին կամ լրացուցիչ B խմբի վիտամինային կոմպլեքս կամ վիտամին B 12 -ի հավելումներ: Խորհրդակցեք ձեր գինեկոլոգի հետ, որպեսզի գտնեք ձեզ համար լավագույն տարբերակը:

Ինչպե՞ս խուսափել երկաթի անբավարարության հետևանքով առաջացած սակավարյունությունից

Ինչպես վերը նշեցինք, վեգան կամ բուսական սննդակարգի հետևողների մոտ առկա է մեկ այլ ալիմենտար անբավարարության ռիսկի առաջացում ՝ երկաթի անբավարարությամբ պայմանավորված սակավարյունություն: Հղիություն պլանավորելիս պետք է հաշվի առնել, որ սակավարյունությունը կարող է մեծացնել օվուլյացիայի հետ կապված խնդիրները և հանգեցնել անպտղության առաջացման ռիսկի մեծացման: Հղիության ընթացքում սակավարյունությունը կարող է խնդիրներ առաջացնել մոր և երեխայի համար:

Ըստ հայտնի դիետոլոգ Յաֆֆի Լվովանի – «Հղիության ընթացքում կանանց համար շատ տարածված խնդիր է սակավարյունությունը։ Բժշկական տեսանկյունից այն ավելի շատ մտահոգիչ է բուսակերների և վեգան բնակչության շրջանակաների համար, քանի որ բուսական սննդակարգում օգտագործվող երկաթը (ոչ հեմային երկաթ) չի ներծծվում այնքան արդյունավետ, որքան հեմ երկաթը (կենդանական աղբյուրներից ստացված երկաթ)»:

Ինչ ուտել

Որպես վեգան, եթե ցանկանում եք սակավարյունության զարգացման ռիսկը նվազեցնել, ապա ցանկալի է, որ դուք ձեր ամենօրյա սննդակարգում ներառեք ոչ հեմային երկաթի պարունակությամբ մեծ քանակությամբ սնունդ, և միաժամանակ այդ սննդի հետ օգտագործեք վիտամին C պարունակող մեծ քանակությամբ սնունդ: Վիտամին C- ի համատեղումը երկաթով հարուստ սննդի հետ օգնում է երկաթի ներծծմանն աղիներից։

Ահա բուսական հիմքով սննդամթերքների ցանկը, որոնք շատ հարուստ են երկաթով․

  • Ձավարեղեն
  • Լոբի
  • Ոսպ
  • Ընկույզ և ընդեղեն, սերմեր
  • Չիր
  • Մուգ թերթերով կանաչիներ
  • Քինոա
  • Մալաս
  • Գետնանուշի կարագ
  • Շագանակագույն բրինձ
  • Տոֆու

Ձեր վիտամին C -ի սննդի աղբյուր կարող է լինել ստորև թվարկածը, որը հիանալի կհամադրվի երկաթի բուսական սննդի հետ `

  • Մի բաժակ նարնջի հյութ
  • Ելակ
  • Արքայախնձոր
  • Բրյուսելյան կաղամբ
  • Կիվի
  • Դեղին բուլղարական պղպեղ

Ձեզ վարող բժիշկը պետք է ուշադիր հետևի ձեր երկաթի մակարդակին և սակավարյունության զարգացման ռիսկին ՝ հղիության ընթացքում արյան ընդհանուր քննությամբ կանոնավոր ստուգման միջոցով։ Միաժամանակ պետք է նաև հետևել երկաթի անբավարարության հետևանքով առաջացած ախտանշաններին, դրանք են՝ հոգնածություն, թուլություն, շնչառության դժվարացում, մաշկի գունատ կամ դեղնավուն երանգ, գլխապտույտ, ձեռքի և ոտքերի սառնության զգացում և գլխացավ», – բացատրում է դիետոլոգ Լվովան:

Եթե ձեր մոտ զարգանում է սակավարյունություն, ապա ձեր բժիշկը կարող է նշանակել համապատասխան վիտամինային հավելումները:

 

Այլ անհրաժեշտ սննդանյութեր

Դիետան ուսումնասիրելը բարդ պրոցես է: Մենք գիտենք, որ վիտամինների պակասը, ինչպիսին է ցածր վիտամին B 12- ը, ֆոլաթթուն և երկաթը, կարող են լուրջ բացասական հետևանքներ առաջացնել: Բայց մենք իրականում գաղափար չունենք այլ սննդանյութերի անբավարարությունների հետևանքը ողջ օրգանիզմի և պտղի վրա, հատկապես, երբ բանը վերաբերում է բուսակերությանը և վեգանիզմին: Պարզապես բավարար քանակությամբ հետազոտություններ չեն իրականացվել։

Գիտենք, որ հղիության ընթացքում ոչ ադեկվատ դիետան (անկախ նրանից ՝ մայրը կենդանական ծագման սննդամթերքներ ուտում է, թե ոչ) կարող է երկարատև ազդեցություն ունենալ երեխայի առողջության վրա: Բայց ճշգրիտ ասել ինչպես և ինչու դժվար է հստակ նշել:

Սպիտակուցներ

Կան շատ վեգանական ուտեսներ, որոնք լավ սպիտակուցային աղբյուրներ են համարվում, այդ թվում ՝ լոբին, ոսպը և ձավարեղենը։

Խնդիրն այն չէ, որ բուսական սննդակարգով չեք կարող բավարար քանակությամբ սպիտակուց ստանալ, բայց եթե ուշադիր չլինեք և ուշադրություն չդարձնեք, կարող է հեշտությամբ ընդունած սնունդը չհամապատասխանի հղիության սննդային պահանջներին:

Հղիության համար օրեկան անհրաժեշտ է մոտ 71 գր. սպիտակուց: Համոզվելու համար, թե բավարար քանակությամբ եք ընդունում այն լավագույն միջոցը, որ կարող ենք առաջարկել՝ մի քանի շաբաթ հատկացրեք ձեր սննդի ընդունման չափման և տվյալների նշման համար: Բավական սպիտակուցներ ուտելը շատ կարևոր է, եթե պատրաստվում եք հղիանալ:

«Սպիտակուցի համապատասխան քանակությունն, անշուշտ, կարելի է բավարարել բուսական կամ վեգանական սննդակարգով», – բացատրում է Լվովան: «Բայց, երբ այդ պահանջները հասնում են օրական մոտ 100 գրամի երկվորյակ հղիության ժամանակ, գուցե անհրաժեշտ լինի հետևել սնուցմանը` առողջ մայր և երեխա ապահովելու համար »:

Լավ գաղափար է նաև ուշադրություն դարձնել բավարար քանակությամբ սպիտակուցներ չստանալու ախտանշաններին: «Եթե կինն ունի սպիտակուցի ցածր պարունակություն, ի թիվս այլ ախտանիշների, նա կարող է զգալ հոգնածություն, կենտրոնացման թուլացում, տրամադրության փոփոխություններ, վերքերի դանդաղ ապաքինում», – ասում է Լվովան:

Վիտամին D

Վիտամին D- ի լավագույն սննդային աղբյուրներն են համարվում յողոտ ձկները (կոդ, սաղմոն, սարդին) և ձվի դեղնուցները: Վիտամին D- ն սովորաբար հանդիպում է նաև հարստացված կաթում, ներառյալ այլընտրանքային կաթը `նուշը և սոյան: Բայց ոչ բոլոր այլընտրանքային կաթերն ունեն վիտամին D- ի զգալի մակարդակ:

Որոշ հետազոտությունների արդյունքում պարզվել է, որ վիտամին D- ի ցածր մակարդակը կապված է եղել անպտղության հետ: Վիտամին D-ի ավելի բարձր մակարդակ ունեցող կանանց մոտ մեծանում է հավանականությունը, որ հեշտությամբ կհղիանան:

Հղիության ընթացքում վիտամին D- ն անհրաժեշտ է ձեր երեխայի առողջ ոսկրերի զարգացման համար: Վիտամին D- ի պակասությունը կապված է պրեէկլամպսիայի ռիսկի բարձրացման հետ: Վեգանները որպեսզի ստանան բավարար քանակությամբ վիտամին D պետք է անպայման կանոնավոր ձևով արևային լոգանքներ ստանան և միաժամանակ օգտագործեն վիտամինային հավելումներ կամ վիտամին D- ով հարստացված սննդատեսակներ:

Կալցիում

Ոչ վեգան բնակչության մեծ մասը կալցիումի պահանջները ստանում է հիմնականում կաթնամթերքի միջոցով։ Այնուամենայնիվ, հնարավոր է կալցիում ստանալ բուսական կերակրատեսակի աղբյուրներից: Դա պարզապես պահանջում է սննդակարգի մանրակրկիտ պլանավորում:

Հետազոտությունները պարզել են, որ կանայք, ովքեր իրենց սննդակարգում ընդգրկում են բազմաթիվ կաթնամթերքնրի տեսականի, ավելի քիչ է հավանականությունը, որ նրանց մոտ կզարգանա էնդոմետրիոզ և ավելի քիչ հավանական է, որ խնդիրներ ունենան օվուլյացիայի հետ: Հղիության ընթացքում կալցիումը չափազանց կարևոր է ձեր երեխայի ոսկրերի և ատամների զարգացման համար:

Կալցիումով հարուստ բուսական սննդամթերքները ներառում են հարստացված այլընտրանքային կաթ, պինտո, կարմիր և սպիտակ լոբի, բոկ չոյ, բրոկկոլի, կաղամբ, սպանախ և քաղցր կարտոֆիլ:

Ցինկ

Միսը և ծովամթերքը ցինկի ամենաբարձր պաշարներն ունեն, բայց այն նույնպես կարող եք ստանալ բուսական աղբյուրներից: Ցինկը կենսական նշանակություն ունի տղամարդկանց պտղաբերության համար: Ցածր ցինկի մակարդակը կարող է առաջացնել սերմնաբջիջների քանակի նվազման և հորմոնալ խանգարումների: Պարզվել է, որ ցինկը նույնպես նպաստում է արտամարմնային բեղմնավորման հաջող ընթացքին, երբ բուժման մեջ գտնվող զույգերը վիտամինային և միկրոտարրերի հավելումներ են ընդունել:

Հղիության ընթացքում բավարար քանակությամբ ցինկ չստանալը կարող է պտղի մոտ հանգեցնել զարգացման դանդաղմանը, մեծացնել վարակի ռիսկերը (ինչը կարող է մեծացնել վաղաժամ ծննդաբերության ռիսկը) և առաջացնել պտղի ցածր քաշ: Ցինկով հարուստ բուսական հիմքով սննդամթերքներն են համարվում լոբին, ընկույզը, սերմերը, վարսակի ալյուրը և հարստացված ձավարեղենը:

Վեգանների համար մեկ այլ խնդիր է հանդիսանում այն, որ ցինկի նեծծումն աղիներից կարող է արգելակվել ֆիտատներով հարուստ սննդամթերքներով: Այդ ցանկը ներառում է ձավարեղենը, ընկույզը և կարտոֆիլը և այլն: Դրա պատճառով գուցե անհրաժեշտ կլինի, որ վեգանները ավելի մեծ քանակությամբ ցինկ ընդունեն, քան ոչ վեգանները:

 

Օմեգա 3

Օմեգա 3-ի համար թիվ մեկ աղբյուրը ձուկն է, ինչը լավ տարբերակ չէ բուսակերների կամ վեգանների համար: Օմեգա 3-ը, DHA- ն և EPA- ն անհրաժեշտ են ուղեղի առողջության համար: Մկների վրա կատարված հետազոտության արդյունքում պարզվել է, որ օմեգա 3-ի ճարպաթթուները կարող են դեր ունենալ ինչպես տղամարդկանց, այնպես էլ կանանց պտղաբերության մեջ, բայց այդ ազդեցությունները դեռ չեն իրականացվել մարդկանց ներգրավածությամբ հետազոտություններ իրականացնելիս:

Հղիության ընթացքում օմեգա 3-ի, EPA և DHA- ի վիտամինային հավելումների տեսքով ընդունումը նվազեցնում է վաղաժամ ծննդաբերության ռիսկը, բարելավում է ծննդաբերության ժամանակ պտղի քաշը և իջեցնում պրեէկլամպսիայի ռիսկը: Հնարավոր է նաև, որ օմեգաները դեր ունենան պտղի ուղեղի զարգացման գործում:

Հղիությունից հետո օմեգա 3-ի ցածր պարունակությունը կարող է մեծացնել հետծննդյան դեպրեսիայի ռիսկը: Մայրիկի սննդակարգում պարունակվող օմեգա 3-ը նույնպես կարևոր է կրծքով կերակրման ժամանակ: Երեխաները, որոնց մայրերը ստացել են օմեգա 3-ի բավարար քանակություն, բարելավել են պտղի մոտ տեսողական և ճանաչողական զարգացումը, և նաև հնարավոր է, որ նրանց երեխաները ենթարկվել են ալերգիայի զարգացման ավելի ցածր ռիսկին: Ընկույզի և սերմերի յուղերը հաճախ առաջարկվում են վեգաններին, բայց ուսումնասիրությունները պարզել են, որ դրանք միշտ չէ, որ ճիշտ են վերափոխվում մարդու օրգանիզմում: Վեգանների համար օմեգայի իդեալական հավելումը համարվում է միկրո ջրիմուռների յուղը: Սա կարող է թանկ արժենալ, բայց այն հարուստ է առողջության համար օգտակար նյութերով:

Յոդ

Յոդն առաջին հերթին մեծ քանակությամբ պարունակվում է ծովամթերքներում և կաթնամթերքներում: Ուսումնասիրությունները պարզել են, որ բուսակերների մեծ մասը ստանում է յոդի նորմալ քանակություն, բայց վեգանները կրկին գտնվում են յոդի անբավարարություն ձեռք բերելու ռիսկի խմբում:

Հղիության ընթացքում բավարար քանակությամբ յոդ չստանալը կարող է բացասաբար ազդել պտղի ուղեղի զարգացման վրա: Վեգանները պետք է անպայման օգտագործեն յոդացված աղ, և նրանց կարող է անհրաժեշտ լինել յոդի պարունակությամբ հավելանյութեր: Այնուամենայնիվ, քանի որ շատ յոդը կարող է խնդիր առաջացնել, նախքան որևէ բան օգտագործելը լավագույն տարբերակը այն է, որ նախորոք խորհրդակցեք ձեր բժշկի հետ:

Հեռու մնացեք անառողջ Վեգանական ուղուց

Շատերը ենթադրում են, որ բուսական կամ վեգանական սննդակարգը ավտոմատ կերպով ձեր համար կդառնա առողջ սննդակարգի ուղի: Ի վերջո, երկու բառերի արմատը բուսական է:

Հղիության ընթացքում հոգնածությունն ու առավոտյան տհաճ զգացողությունները կարող են նաև ավելի տանջել ձեզ, քանի որ դուք ձեր սննդակարգում օգտագործում եք մեծ ծավալներով բարձր ածխաջրերով հարուստ դժվարամարս սնունդ։

Դժվար յուրացվող ածխաջրերի և հացահատիկի չափազանց մեծ սպառումը,կարող են բարձրացնել հղիության դիաբերի առաջացման վտանգի ռիսկ:

Իսկ ո՞ րն է լուծումը։ Ուշդիր մանրակրկիտ սննդակարգի մշակումն է: Լրացուցիչ ջանքեր գործադրելով ներառել սննդակարգում ձավարեղենի ամբողջ տեսականին, շատ բանջարեղեն և առողջ բուսական սպիտակուցներ ՝ լոբի, ընկույզ, ոսպ:

Խոսք My Kid-ից

Իհարկե բուսական սնունդը շատ օգտակար և դրական կողմեր ունի, ներառյալ այն, որ նվազեցնում է արյան բարձր ճնշման, սրտի հիվանդությունների, նյութափոխանակության համախտանիշի և որոշ քաղցկեղների առաջացման ռիսկի գործոնները: Բուսակերները նույնպես հակված են ավելի առողջ քաշ ունենալուն: Շատ բանջարեղեն, առողջ հացահատիկային խմիչքներ և մրգեր ուտելը, ամենայն հավանականությամբ, օգուտ կբերի ցանկացած հղիության համար և կնպաստի շուտ հղիանալուն:

Այնուամենայնիվ, վեգան սննդակարգը հանգեցնում է որոշ կենսական նշանակություն ունեցող սննդանյութերի քանակի անբավարարությանը կամ ցածր մակարդակի առաջացմանը: Մարդիկ վեգան սննդակարգ են ընտրում տարբեր պատճառներով: Որոշ իրավիճակներում վեգանները կամ բուսակերները կարող են հանուն իրենց առողջության թուլացնել իրենց խիստ սննդային սահմանափակումները հենց հղիանալու փորձերի ժամանակ կամ հղիության ընթացքում:Եթե ​​հղիանալ փորձելիս կամ հղիության ընթացքում նախընտրում եք մնալ վեգան, խորհուրդ է տրվում նաև խորհրդակցել դիետոլոգի հետ, ով կօգնի ձեզ ստանալ այն, ինչ ձեզ և ձեր երեխային անհրաժեշտ է: