![](https://mykid.am/wp-content/uploads/2020/09/massazhvsanatoriilazurnyiyminsksanatoriydetskiymassazh-1524663877.jpg)
Ձեր երեխայի փորիկի, կրծքավանդակի և մեջքի մերսումը
1․Պահպանեք տեսողական կոնտակտ և քնքշորեն խոսեք ձեր բալիկի հետ։ Մերսման ընթացքում երեխայի հետ պահպանեք տեսողական կոնտակտ և նուրբ, փաղաքշական ձայնով խոսեք նրա հետ։ Սա կօգնի ամրացնել ձեր երկուսի միջև կապը և կօգնի ձեր երեխային սովորել կառավարել իր էմոցիաները։
2․Շարժեք ձեր ձեռքը կրծքավանդակի հիմքից դեպի փորիկը։ Տեղադրեք ձեր ձեռքը երեխայի իրանին՝ ափով ներքև։ Շոյելով իջեցրեք ձեռքերը դեպի ներքև՝ մի փոքր ճնշում գործադրելով։ Ձեռքը շարժեք հորիզոնական հարթության մեջ, որպեսզի մերսեք ձեր բալիկի մարմնի աջ և ձախ կողմերը։
- Շատ զգույշ եղեք ճնշում գործադրելիս՝ հատկապես ձեր բալիկի կյանքի առաջին մի քանի շաբաթվա ընթացքում։ Մինչդեռ ապացուցված է, որ թեթևակի ճնշում գործադրելը ունի օգտակար հատկություններ, այնուամենայնիվ, ձեր երեխայի փոքրիկ մարմնին չափից շատ ճնշում գործադրելը կարող է վտանգավոր լինել։
3․Օգտագործեք ձեր մատերի ծայրերը՝ երեխայի որովայնին շրջաններ գծելու համար։ Շարժվեք ժամացույցի սլաքի ուղղությամբ։ Մերսման այս տեսակը օգնում է լավացնել մարսողությունը։ Չզարմանաք, եթե ձեր փոքրիկն այդ ընթացքում գազեր բաց թողնի։ Դա նշանակում է, որ մերսումը ճիշտ եք իրականացնում և այն օգնում է։
4․Նրբորեն կատարեք այսպես կոչված «I love you» շարժումները։ Այս մեթոդը ներառում է անգլերեն «I», «L» և «U» տառերի նման շարժումներ։ Սկսեք «I» տառից (պարզապես կատարեք վերև-ներքև գծային շարժումներ) երեխայի մարմնի ձախ կողմում։ Այնուհետև կատարեք հակառակ «L» շարժումը՝ շոյելով երեխայի կրծքավանդակի ներքևից դեպի ձախ կողմը։ Վերջապես կատարեք շրջված «U» շարժումը՝շարժելով ձեր մատերը երեխաս փորիկի աջ կողմով դեպի վերև, պորտի շուրջ և ձախ կողմով դեպի ներքև։
- Այս «I love you» մերսումը անելիս ամեն շարժում կատարելիս քնքշորեն ասացեք համապատասխան բառը։
5․Գծեք սրտիկ ձեր երեխայի կրծքավանդակին։ Օգտագործեք ձեր մատերի ծայրերը թեթևակի ճնշում գործադրելու համար։ Սկսեք կրծոսկրից (կրծքավանդակի ստորին եզրի մեջտեղում) և շարժվեք վերև և կողք՝ կրծքավանդակով մինչև ուսերը։ Արեք այնպես, որ երկու ձեռքերի մատերը հանդիպեն իրար երեխայի կրծքավանդակի վերևի հատվածում։
6․Ձեր երեխայի ամբողջ իրանով մեկ գծեք «X» տառը։ Շոյեք երեխայի կոնքից մինչև հակառակ կողմի ուսը։ Այնուհետև կրկնեք մյուս կողմի վրա։
7․Երեխայի մեջքը մերսելու համար տեղափոխեք նրան ձեր ծնկներին կամ կրծքին։ Եթե ցանկանաք, ապա կարող եք նաև երեխային պառկեցնել ձեր առջև վերմակի վրա՝ փորիկով ներքև։ Երկու դեպքում էլ համոզվեք, որ երեխայի գլուխը թեքված է դեպի մի կողմ, որպեսզի նա կարողանա հանգիստ շնչել։
- Մաշկ-մաշկ կոնտակտը ունի շատ դրական կողմեր, ներառյալ հանգստացնող և հարմարավետ միջավայրի ստեղծումը։ Պառկեցնելով երեխային ձեր մերկ կրծքավանդակին՝ դուք թուլ եք տալիս նրան լսել ձեր սրտի զարկերը, զգալ ձեր մաշկի տաքությունը և հոտը։
8․Երեխայի մեջքը մերսելու ընթացքում կատարեք շրջանաձև շարժումներ և շոյեք վերևից ներքև։ Օգտագործեք ձեր մատերի ծայրերը և խուսափեք ճնշում գործադրելուց։ Դրա փոխարեն երեխայի մեջքի աջ և ձախ կողմերում մատերով գծեք շրջաններ։ Այնուհետև մատերի ծայրերը օգտագործելով շոյեք երեխայի վզից դեպի ներքև՝ հասնելով հետույքին կրկին բարձրացեք վերև դեպի վիզը։ Եվ վերջում ձեր մատերի օգնությամբ ստեղծեք փոցխ և վերև-ներքև շարժումներով նրբորեն «փոցխեք» ձեր փոքրիկի մեջքը։
Ձեր երեխայի գլխի և դեմքի մերսումը
1․Երկու ձեռքով զգուշորեն բռնեք երեխայի գլուխը՝ նրա գլխամաշկը մերսելու համար։ Բռնեք ձեր երեխայի գլխի և պարանոցի տակից՝ համոզվելու համար, որ վերջիններս լավ հենված են։ Օգտագործեք մատերի ծայրերը երեխայի գլխամաշկին նրբորեն փոքրիկ շրջաններ գծելու համար։ Խուսափեք նրա գլխի գագաթում գտնվող փափուկ հատվածից։
2․Երեխայի դեմքի եզրերով գծեք սրտիկ։ Օգտագործեք ձեր ցուցամատերի ծայրերը։ Սկսեք երեխայի գլխի վերին հատվածից՝ շարժվելով դեպի նրա կզակը։
3․Շոյեք երեխայի ունքերը, քիթը և թուշիկները։ Այս շարժումների համար ևս կարող եք օգտագործել ցուցամատերը։ Եղեք շատ զգույշ և շարժումները արեք դանդաղ։ Դուք կարող եք նաև ասել ձեր բալիկի, թե իր դեմքի որ հատվածին եք դիպչում։
4․Մերսեք ձեր երեխայի ծնոտը նուրբ, շրջանաձև շարժումներով։ Օգտագործեք միայն ձեր մատերի ծայրերը և գործադրեք թեթևակի ճնշում։ Այնուհետև կարող եք շրջաններ գծել երեխայի փոքրիկ թուշիկներին։
Ձեր երեխայի ձեռքերի և ոտքերի մերսումը
1․ Ձեր մատերի օգնությամբ ստեղծեք «թևնոց« և այդպես շոյեք երեխայի ձեռքերը։ Նրբորեն բռնեք ձեր երեխայի դաստակը մի ձեռքով, իսկ մյուս ձեռքով շրջանաձև բռնեք երեխայի ձեռքը ուսից ներքև և շոյելով իջեցրեք դեպի ներքև։ Դուք նաև կարող եք զգուշորեն «կթել» երեխայի ձեռքը՝ ներքև շարժվելիս գործադրելով թեթևակի ճնշում։ Կրկնեք այս շարժումները մյուս ձեռքի վրա։
- Դուք կարող եք ամեն կողմից մի քանի անգամ կատարել այս շարժումները։
2․Տրորեք երեխայի ափերը ձեր բթամատերով։ Երեխայի ձեռքը թուլացնելու համար մատերի ծայրերով սեղմեք նրա ձեռքի վերին հատվածում։ Այնուհետև բթամատերով մերսեք երեխայի ձեռքի հիմից մինչև նրա ափի գագաթը։ Կրկնեք մյուս ձեռքի վրա։
3․Տրորեք և ուղղեք երեխայի բոլոր մատերը։ Շրջեք երեխայի ձեռքը ափով ներքև և սկսեք շոյել նրա դաստակից դեպի յուրաքանչյուր մատի ծայրը։ Երբ ձեր ուշադրությունը շեղում եք մատերի վրա, ապա մի մոռացեք, որ չպետք է շատ ճնշում գործադրել։ Չմոռանաք նաև մերսել մյուս ձեռքը։
4․Երեխայի ազդրի վրա կատարեք «C» տառի նման շարժումներ։ Սա նույն «թևնոցի» շարժումն է, որ արել էիք երեխայի ձեռքերի վրա։ Շոյեք երեխայի ազդրի ինչպես արտաքին, այնպես էլ ներքին կողմերը՝ շարժվելով նրա կոնքից դեպի ծունկը։ Կատարեք այս շարժումը մի քանի անգամ, այնուհետև անցեք մյուս ոտքին։
5․Օգտագործեք բթամատերը և մատերի ծայրերը՝ ձեր երեխայի ոտնաթաթերը մերսելու համար։ Շարժեք ձեր բթամատերը՝ մեկը մյուսի վերևից դնելով, կարծես ձեր բալիկի տոտիկի տակով աստիճան եք բարձրանում։ Այնուհետև մեկ շարժումով շոյեք երեխայի կրունկից մինչև մատերը։ Դուք կարող եք նաև նրբորեն, շրջանաձև շարժումներով շոյել նրա ոտքը։ Եվ վերջում, ձեր մատերի ծայրերով փոքրիկ շրջաններ գծեք երեխայի կրունկներին։
6․Մարզեք երեխայի ոտքերը զգուշորեն կատարելով հեծանիվ քշելու շարժում։ Մերսման այս հատվածը կօգնի ձեր երեխային հավաքել քաշ, լավացնել նրա ոսկրերի զարգացումը և բարելավել մարսողությունը ու թեթևացնել գազիկներից առաջացող ցավերը։ Զգուշորեն բռնեք երեխայի ոտքերից երկու ձեռքերով։ Այնուհետև հերթով շարժեք երեխայի ոտքերը դեպի նրա փորիկը և ետ։
7․Շարժեք երեխայի ձեռքերը ներս և դուրս՝ կատարելով թիթեռնիկի թևերի նման շարժում։ Բռնեք ձեր երեխայի ձեռքերը և ժպտացեք նրան։ Այնուհետև շարժեք նրա ձեռքերը ներս և դուրս՝ կրծքավանդակի շուրջ, օգնելով նրան ծալել իր արմունկները։
Ինչպե՞ս մերսման համար ստեղծել իդեալական պայմաններ
1․Մերսման համար տրամադրեք առնվազն 30 րոպե ժամանակ։ Ընտրեք այնպիսի ժամ, երբ համոզված եք, որ չեք շտապի։ Այսպիսով` ինչպես ձեր բալիկի, այնպես էլ ձեր համար կստեղծեք հանգիստ միջավայր։
- Քանզի մերսումը հանգստացնելու է ձեր բալիկին և դարձնելու է նրան քնկոտ, ապա մտածեք այն ուղղությամբ, որ մերսումը դարձնեք քնելուց առաջ կատարվող մշտական գործողություն։ Կամ եթե մերսելու եք ձեր երեխային լոգանքից առաջ, ապա հնարավորություն կունենաք մերսման համար օգտագործել տարբեր յուղեր, որոնք կկարողանաք լվանալ երեխայի մաշկից լոգանքի ընթացքում։
2․Սպասեք մինչև ձեր երեխան մարսի կերածը և առույգ լինի։ Կերակրելուց հետո սպասեք առնվազն մեկ ժամ՝ երեխային մերսելու համար։ Սա կօգնի նրան ամբողջովին մարսել կերածը։ Մերսումը նաև ավելի արդյունավետ կլինի, եթե ձեր երեխան առույգ լինի։
3․Տաքացրեք սենյակը մոտ մինչև 24 °C և փռեք վերմակ։ Քանզի դուք հանվեցնելու եք ձեր երեխային մինչև տակդիրը, ապա ավելի լավ կլինի, որ մերսման համար սենյակը գտնվի տան տաք հատվածում։ Սա կօգնի, որ ձեր երեխան չմրսի մերսման ընթացքում։ Փռեք հաստ և փափուկ վերմակ, որպեսզի մերսման ժամանակ երեխային պառկեցնեք դրա վրա։
4․Օգտագործեք սննդային, առանց հոտի յուղեր՝ մերսման օգուտը լավացնելու համար։ Ամենալավ ընտրությունը կոկոսի կամ արևածաղկի յուղերն են, քանզի վերջիններս չեն խցանի երեխայի ծակոտիները։
- Յուղերի օգտագործումը պարտադիր չէ, սակայն ապացուցված է, որ նրանք ավելացնում են մերսման օգուտը։ Յուղերը օգնում են խոնավ պահել երեխայի մաշկը, ինչպես նաև կարող են օգնել քաշ հավաքելու մեջ։ Յուղը տաքացնելու համար շփեք այն ձեր մատերի արանքում։
5․Երգեք ձեր երեխայի համար կամ միացրեք հանգստացնող օրորոցայիններ։ Օգտագործեք ձեր ձայնը երեխային հանգստացնելու համար։ Երգելով խոսեք երեխայի հետ և միևնույն ժամանակ միացրեք որևէ հանգստացնող երաժշտություն։ Կամ երաժշտությունը ապահովեք ինքներդ՝ երգելով երեխայի համար։
6․Սովորեք ձեր երեխայի դրական և բացասական արձագանքները։ Ժամանակի ընթացքում դուք կսովորեք ձեր երեխայի անձնական նշանները։ Սովորաբար ուրախ երեխաները քրքջում են, գազեր բաց թողնում, տեսողական կոնտակտ ստեղծում ձեզ հետ և շնչում են հանգիստ և հավասարաչափ։ Իսկ նյարդային երեխան կարող է զկռտալ, մաշկի վրա ունենալ կարմիր կամ գունատ բծեր, խուսափել ձեր վրա կենտրոնանալուց և լաց լինել։